Ábyrgð
Ábyrgðin er allra
Öryggi er sameiginlegt verkefni. Til að skapa öruggt vinnu- og námsumhverfi þurfa allir að vera vakandi, fylgja leiðbeiningum og sýna ábyrgð í daglegum störfum. Ábyrgðin liggur bæði hjá stofnuninni, þeim sem stýra starfi og kennslu, og hverjum einstaklingi sem notar húsnæði, búnað og aðstöðu
Stofnunin ber ábyrgð á því að byggingar, aðstaða og búnaður séu örugg og í góðu viðhaldi.
Hún sér til þess að viðeigandi öryggisráðstafanir séu til staðar, að upplýsingar og leiðbeiningar séu aðgengilegar og að brugðist sé við ábendingum um það sem betur má fara.
Stofnunin skapar þannig umgjörðina sem öruggt starf byggir á.
Yfirmenn og kennarar bera ábyrgð á að vera góðar fyrirmyndir í öryggismálum. Þeir eiga að kynna sér reglur og leiðbeiningar, miðla þeim áfram og hvetja til öruggra vinnubragða.
Þeir hafa einnig mikilvægu hlutverki að gegna við að skapa menningu þar sem eðlilegt er að ræða áhættu, spyrja spurninga og bregðast við áður en eitthvað fer úrskeiðis.
Starfsfólk og stúdentar bera ábyrgð á að fylgja leiðbeiningum, kynna sér varúðarráðstafanir og ganga vel um húsnæði, búnað og vinnusvæði.
Hver og einn þarf að sýna ábyrgð í eigin hegðun og taka tillit til annarra.
Við berum líka ábyrgð hvert á öðru: ef við sjáum að eitthvað stefnir í óefni er sjálfsagt að láta vita, benda á hættu eða aðstoða við að koma málum í réttan farveg.